Պրոբացիայի պետական ծառայության աշխատակիցները վերապատրաստվում են

ՀՀ ԱՆ պրոբացիայի պետական ծառայությունում  մայիսի 21-ից 25-ն անցկացվում է աշխատակիցների վերապատրաստման ‹‹Բազմաոլորտային ազգային հարթակի ուժեղացում՝ ուղղված երեխաների հանդեպ բռնությունը վերջ դնելու գործողությունների պլանավորմանը,  իրագործմանը և գնահատմանը›› ծրագիրը:

ՀՀ  ԱՆ  պրոբացիայի պետական ծառայության պետ Արսեն Նավասարդյանը ծրագրի մեկնարկի առիթով ողջունել է մասնակիցներին՝ նշելով, որ այս վերապատրաստումը աշխատակիցներին հնարավորություն կտա ծանոթանալու կատարված օրենսդրական փոփոխություններին, կատարելագործելու կառավարչական հմտությունները և ունակությունները, տեսական և գործնական առաջադրանքների շնորհիվ ստանալու աշխատանքում հանդիպող մի շարք խնդիրների և հուզող հարցերի պատասխանը:

Վերապատրաստման ծրագրի ընթացքում կքննարկվեն Պրոբացիայի պետական ծառայության ներքին կանոնակարգը, վերահսկողության պլանի և խորհրդատվական զեկույցի կազմման, շահառուների ռիսկերի և պահանջմունքների (կարիքների) գնահատման հմտություններն ու առանձնահատկությունները, պրոբացիայի ծառայության դերը, ինչպես նաև երեխաների պաշտպանության  համակարգը  Հայաստանում թեման, հանցագործություն կատարած անձանց հոգեբանական տիպաբանությունն ու վերասոցիալականացման գործընթացում հոգեբանական և սոցիալական աշխատանքները:

Դասընթացները կվարեն «Իրավական կրթության  և վերականգնողական ծրագրերի իրականացման կենտրոն» ՊՈԱԿ-ի տնօրենի տեղակալ Գայանե Հովակիմյանը, իրավական փորձագետներ Արփի Սարգսյանը և Արամ Դարբինյանը, հոգեբան-փորձագետ Անահիտ Խաչատրյանը:

Նշենք, որ ծրագիրն իրականացվում է Հայաստանում ՄԱԿ-ի մանկական հիմնադրամի (UNICEF) ֆինանսավորմամբ: