Դեպի վեր

Փոխնախարար Խաչիկյանն ընդունել է այլընտրանքային խափանման միջոցների կիրառման ամերիկյան փորձին ծանոթացած խմբի անդամներին

07/05/2019

Արդարադատության նախարարի տեղակալ Տիգրան Խաչիկյանը մայիսի 6-ին ընդունել է Ամերիկյան իրավաբանների ընկերակցության իրավունքի գերակայության նախաձեռնության քրեական արդարադատության շուրջ գործակցության և գործընկերության ծրագրին մասնակցած խմբի անդամներին:

Հանդիպման ընթացքում կողմերն անդրադարձել են այլընտրանքային խափանման միջոցների ներդրման և զարգացման հնարավորություններին, ինչպես նաև առաջիկա համագործակցության ձևաչափին առնչվող մի շարք հարցերի:

Փոխնախարար Խաչիկյանը գործընկերներին տեղեկացրել է, որ առաջիկայում նախանշված է Պրոբացիայի մասին օրենքի փոփոխությունների նախագծի ամփոփումը, որի շրջանակում պատրաստակամություն է հայտնել քննարկել խմբի անդամների ներկայացրած առաջարկները: Միևնույն ժամանակ, Տիգրան Խաչիկյանը կարևորել է, որ այլընտրանքային խափանման միջոցներին առնչվող լուծումները կրեն համալիր բնույթ՝ իրենց արտացոլումը գտնելով և´ քրեակատարողական, և´ քրեադատավարական ոլորտներում:

Ամփոփելով հանդիպումը՝ կողմերը պայմանավորվածություն են ձեռք բերել հաջորդ աշխատանքային քննարկումն առավել ընդլայնված կազմով անցկացնելու վերաբերյալ, որի ժամանակ կանդրադառնան նաև աշխատանքային խմբի առաջարկների համատեքստում ֆինանսական հետևանքներ առաջացնող և այդպիսի հետևանքներ չառաջացնող լուծումների տարանջատմանը:

Քննարկել
Վերադառնալ նախորդ էջ
Նախարարություն Գործառույթներ Գրադարան Տեղեկատվական կենտրոն Ընդունելություն

Բաժանորդագրություն