Դեպի վեր

Հանրային արշավ՝ ուղղված երեխաների հանդեպ բռնության վերացմանը

26/09/2017

 ՀՀ արդարադատության նախարարի տեղակալ Սուրեն Քրմոյանն այսօր մասնակցել է «Բռնությունը փոխարինենք սիրով» երեխաների հանդեպ բռնության վերացմանն ուղղված հնգամյա հանրային արշավի մեկնարկին, որը տեղի է ունեցել Հովհաննես Թումանյանի թանգարանում:

 Միջոցառումը կազմակերպել էր «Վորլդ Վիժն Հայաստան» հասարակական կազմակերպությունը. նախաձեռնությանը միացել են երեխաների իրավունքների պաշտպանությամբ զբաղվող հայաստանյան տասը հասարակական կազմակերպություններ:

 Սուրեն Քրմոյանն արդարադատության նախարարի ողջույնը փոխանցելով ներկաներին՝ կարևորել է միջոցառման նախաձեռնումը երեխաների իրավունքների պաշտպանության համատեքստում: Նախարարի տեղակալը նշել է, որ Կառավարության ծրագրի համապատասխան բաժիններում ամրագրված է երեխաների իրավունքների պաշտպանությանն ուղղված առաջիկա միջոցառումների իրականացումը, այնուհետև ներկայացրել է Անչափահասների արդարադատության խորհրդի գործունեությունը, որում ներգրավված շահագրգիռ կառույցների ներկայացուցիչները պարբերաբար քննարկում և լուծումներ են առաջարկում իրավապահ համակարգի հետ առնչություն ունեցող անչափահասների խնդիրներին:

 Ամփոփելով խոսքը՝ Սուրեն Քրմոյանը հավելել է, որ ՀՀ արդարադատության նախարարությունը, որպես առաջնահերթություն դիտարկելով երեխաների իրավունքների պաշտպանությունն ու նրանց նկատմամբ բռնության կանխարգելումը՝ պատրաստակամ է համագործակցելու և աջակցելու երեխաների իրավունքների պաշտպանությանն ուղղված քայլերին բոլոր հարթակներում: 

Քննարկել
Վերադառնալ նախորդ էջ
Նախարարություն Գործառույթներ Գրադարան Տեղեկատվական կենտրոն Ընդունելություն

Բաժանորդագրություն